Tag Archives: Covid-19

Isa pang tugon sa pag-iingay ng DDS

Paghahati sa Iniluwal na Kaban ng Bayan

“Araw-araw, binibilang ang mga nabubuwal…
Sa gutom ay natatakot yaong nag-aagawan,
Kinakalas na ang batas, pumapalag kung masúkol. ”
– “Luwalhati” ni Rebecca T. Añonuevo

Maiging maunawaan na hindi mahika
ang agham. Lohika ang wika nito,
batay sa masusing pagmamasid, paghahanap
ng mga kaugnayang madalas hindi inaasahan.

May sukat na limitado ng panukat,
may panghuhula, ngunit may materyal na
kinahahabian, tila sapot na kay dali ring mapigtal
kung mapapatunayang may ibang posibleng paliwanag.

Kaya dating makatang bula na ngayon
ang lohika, bakit mo tinutuya na tila kakilala
ang Kamatayan? Sa ibang panahon, mapapalampas
sana ito, parang ingay sa perya na naghahatid
ng panandaliang paglimot sa pang-araw-araw na pagod.

Maaari mo pang mala-Hamlet na hawakan
ang bungo ng kung-sinong estranghero,
magyayakyak ka’t magtitili hanggang umusbong
ang lahat ng litid mula leeg hanggang kilikili.

Ngunit sa ilalim ng kasalukuyang rehimen
na iyong sinasamba, katawa-tawa.
Hindi tawang may tuwa,
kundi matinding kapaitan.

Gamitan mo kaya ng agham ang pagbibilang
sa iniluwal na kaban ng bayan?
Hanapan mo kaya ng mga materyal na patunay
ang landas na tinahak ng bawat piso
sa bilyon-bilyong ipinagkatiwala sa tuliro-
kung-magsalita mong poon?

“Tahimik ngayon ang paligid, ngunit di lubhang tahimik,”
ang wika mo. Ang tugon dapat ng Kamatayan,
mula rin sa iyong salita: “Traydor ka
mula’t mula, hindi patas kung lumaban.”

-o-


Diyan Mismo sa Flag







Diyan Mismo sa Flag

“Magkikita na lang tayo diyan sa Rizal Park.
Diyan mismo sa flag ni Rizal magbigti na lang ako.”
– Rodrigo Roa Duterte, 6 Abril 2020

May bunganga ang basurahan. May bunganga
ang imburnal, ang inidoro, ang halimaw na gabi lamang
kung mag-iingay. Samantala, nais magpahinga
ang mga may kaluluwa at pagod ang katawan.

Ngunit kaya nga halimaw ang tawag sa halimaw.
Nanghahalina, nais mangibabaw sa paraang kanyang-kanya.
Maging ang bandila ng bayani na malaon nang yumao,
gagawing pambigti. Akala mo may kakawalang kaluluwa

sa kanyang kalamnang pumipintig lamang
habang nagpapakahayok at nagpapasasa
sa karimlang kinasalampakan.
Kung maaari lang, kumilos sana

ang estatwa ni Pepe,
sipain ka sa bayag.
Ngunit wala ka, eh.
Ay heyt drags.

-o-

Apologies for those who cannot read Filipino. I’ll try to work on a translation when I get a chance.